Mukhlis Maman Murakata Putra
B A G A S I N G
Suk lai asi ulai bini saraba asi
cinik baulai janum
di pantau takirap gasing baganti
amun kada manandi satumat barang
turun halu pusing kiwa
jajarat babuhul gasing kapat
nang manandai naik
nang kapat cir cirak kalalatu
pasang liir
daun kanas dikikis gasan tali
batang kamuning ditarah diraut
apik gawiannya
latui dipidak kada aasaan
pacah kasitu sahimpil
umailah purun kabatan apus
hanyar dihampalas sudaham gurai
tagal nang ngaran handak
jangan pacah talu, pacah walu
tatap kada manampik
Y.S. Agus Suseno
K A Y U H B A I M B A I
ayu bangun anakku buah hati caramin mata
ari sudah landung siang
lakasi kita bakayuh kamuhara
batimpungas ikam anakku nang baiman
bawa pangayuh bukah ka jukung
si nanang atawa si galuh nang tagancang di haluan
nang kaur mata manimba di buritan
ayu hancapi ayun pangayuh
kaih ilung ka higa sampung
hantak pangayuh baimbai
tuju muhara sungai
jukung balumut sagin balaju
timbun dupa kurrr sumangat lambung mangkurat
lilit babatsal pitua raga samudra
babatis tunggal bapitulakan malangkah watun
turn baluncat bajajak di babun
phusss! nang di anjung nang di tambangan!
jangan bakakutanan!
muhara masih jauh
di sana kita malabuh sauh
lalu badaku sambil manyapu paluh
Posting Komentar